Sètzèl = STZL

Sètzèl: Yon tifi ki gen twòp lespri, ki pa pè gade moun nan je.
Sinonim: Yon moun yo pa ka kontwole.

An Ayiti, lè yo vle mete yon tifi nan plas li, yo rele l Sètzèl. Nan lang Kreyòl, yon tifi yo rele Sètzèl twòp pou laj li. Li twò entèlijan, twò sou men l, twò soumoun, twò… twò…. STZL kwè li nesesè pou n kenbe byen vivan lespri Sètzèl la ki ka ede fanm, tifi, jèn moun, ak kominote ki pi piti yo vin mèt tèt yo.

  • Idantite

    Chèche epi fè pwomosyon valè ki sanble ak sa nou ye toutbon, ki ka fè nou tounen yon meyè vèsyon de tèt nou.

  • Feminite

    Redefini sa sa vle di pou yon tifi, yon fanm Ayisyèn ka pran desizyon ki eklere epi enfòme pou lavi l ak avni l.

  • Seksyalite

    Fè pwomosyon yon seksyalite ki responsab, kote plezi ranplase laperèz pou jèn gason ak jèn fanm an Ayiti.

Òganizasyon an

STZL se yon òganizasyon lokal k ap remete an kesyon epi pwopoze nouvo lide pwogresis sou idantite, feminite ak seksyalite. Misyon STZL se dekonstwi mantalite tou fèt pou konstwi yon lòt fason panse kote fanm ak tifi, jèn moun ak kominote zwit yo ka redefini tèt yo pou tèt yo. 

STZL angaje l nan kreye konvèsasyon ak inisyativ miltimedya orijinal l ki ka enfliyanse diskou piblik la. Travay STZL dekonstwi mantalite tou fèt, defèt pawòl ki pa baze sou verite epi kesyone nòm sosyokiltirèl ki danjere, ki se obstak pou byennèt kolektif nan sosyete ayisyèn lan. STZL se yon lòt pwopozisyon pou chak jenerasyon rive gen zouti pou pi byen defini tèt yo pou tèt yo.

Kontak

Ranpli fòmilè sa a pou w kontakte, sipòte oubyen kolabore ak STZL. N ap reponn ou nan yon ti moman.